Mediu Rural va convocar "probablemente" en 10 díes ayudes por 1,6 millones énte la EHE

A Veiga acueye l'alcuentru 'Presente y futuru del mediu rural n'Asturies'

N'A Veiga güei trátase'l 'Presente y futuru del mediu rural n'Asturies'.

Un alcuentru entamáu pol Foru de Comunicación, que xunió nuna charra a sindicatos agrarios, oposición, gobiernu y empreses.

Nel presente, lo que más esmolez ye la enfermedá hemorráxica. Les organizaciones agraries aseguren que prácticamente en toles esplotaciones asturianes hai dalgún animal enfermu, cola medría de costos pa los ganaderos. Piden más axilidá y medios na xestión de les amueses y nos tratamientos.

Mediu Rural va convocar "probablemente" en 10 díes ayudes por 1,6 millones énte la EHE

El conseyeru de Mediu Rural y Política Agraria, Marcelino Marcos Líndez, afirmó esti domingu que'l Principáu va habilitar "probablemente" nos próximos 10 díes la convocatoria d'ayudes frente a la enfermedá hemorráxica epizóotica (EHE), dotada con 1,6 millones d'euros pa iguar los efectos que supunxo esta pandemia na ganadería asturiana dende setiembre de 2023 a abril de 2024.

El problema de la enfermedá hemorráxica "nun depende de medios que tenga qu'apurrir" la Conseyería, señaló n'A Veiga, onde participó nel alderique Presente y futuru del mediu rural n'Asturies'.

"Otra cosa", amestó, ye que'l so departamentu comprometióse a convocar una serie d'ayudes pa tratar d'iguar los costos de la enfermedá. El so presupuesto va habilitase probablemente en 10 díes, con una partida de 1,6 millones que realmente va contribuyir como ayuda a más de 500 esplotaciones ganaderes que tuvieron dalgún tipu d'efectu contrastáu ente setiembre de 2023 y abril de 2024.

Anunció que va ser una "tramitación directa", como socedió nes ayudes de la seca abonaes el pasáu mes d'avientu, de manera que se va aprobar nel Conseyu de Gobiernu y los afectaos, a los pocos díes, "van tener l'ingresu" na so cuenta bancaria.

Los protocolos de prevención son “mui claros", dixo'l titular del ramu, "los mesmos" que rixen n'otres comunidaes autónomes, a los que se suma qu'anguaño hai vacuna escontra la enfermedá hemorráxica, "que ye "voluntaria".

A diferencia d'enfermedaes como la llingua azul, de vacunación obligatoria y que se tresmite "ente animales", Marcos Líndez consideró que la magnitú ye “distinta”. Lo que nun dexa d'esmolecer a los responsables de la conseyería, "conscientes" de que la EHE "diba volver".

"Nunca lo negamos, somos conscientes de qu'hai casos, y espublizamos que ye importante que los titulares de les esplotaciones, cuando hai una sintomatoloxía, llamen al veterinariu clínicu, saquen una amuesa pa realmente saber la magnitú que tien la enfermedá y como elementu útil pa poder recibir les ayudes afayadices que comprometimos", detalló.

En relación al sofitu, consideró que "non toos puen dicir lo mesmo", refiriéndose de manera espresa a "delles formaciones polítiques de la derecha y la ultraderecha" que defenden que l’alministración pague'l costu de les vacunes y, sicasí, "nin nes ayudes nes partíes presupuestaries votaron a favor d'esos presupuestos".